រុក្ខជាតិប្រភេទផ្កាមួយចំនួន មិនត្រឹមតែមានសម្រស់ស្រស់ស្អាត​និងសម្រាប់ដាំលម្អប៉ុណ្ណោះទេ ប៉ុន្តែវាថែមទាំងដើរតួជារុក្ខជាតិឱសថបែបបុរាណដែលដើរតួយ៉ាងសំខាន់បម្រើឱ្យជីវិតរស់នៅមនុស្ស-សត្វ។ ខណៈនេះ SBM News នឹងលើកយករុក្ខជាតិផ្កាដ៏មានអត្ថប្រយោជន៍ ៦ ប្រភេទ ដែលត្រូវបានគេប្រើប្រាស់ជាឱសថយ៉ាងទូលំទូលាយនៅក្នុងប្រទេសឥណ្ឌា៖ 

ផ្កា រំយោល

រំយោល គឺជាផ្កាពណ៌ក្រហមដ៏មានការដាំដុះដ៏ពេញនិយមបំផុតនៅកម្ពុជាយើង ហើយក៏ត្រូវបានគេស្គាល់ថា ជាផ្កាទេវៈដ៏សំខាន់បំផុតដែលត្រូវបានគេគោរពនៅក្នុងប្រទេសឥណ្ឌា និងជាផ្កាសំណព្វរបស់អាទិទេពក្នុងសាសនាហិណ្ឌូ។ ផ្កាប្រភេទនេះ ត្រូវ​បាន​គេ​ដាំដុះ​ជា​រុក្ខជាតិ​លម្អ បន្ថែមពីនេះ ​តែ ឬទឹកតែ ​ដែលផលិត​ពី​ផ្កានេះត្រូវបានគេដឹងថា មាន​ជីវជាតិ​ខ្ពស់​ជាមួយ​នឹង​​វីតាមីន C ដ៏ច្រើនលើសលុប និងមាន​ការ​ប្រើប្រាស់​ផ្សេងៗទៀតផ្នែក​វេជ្ជសាស្រ្ដ​នៅ​ក្នុងប្រទេសឥណ្ឌាផងដែរ។

ផ្កាស្បៃរឿង

ផ្កាស្បៃរឿង មានឈ្មោះទូទៅជាភាសាអង់គ្លេសគឺ marigold ។ វាគឺជាផ្កាដែលមានការប្រើប្រាស់ដ៏ពេញនិយមយ៉ាងខ្លាំងនៅក្នុងវប្បធម៌ឥណ្ឌាក្នុងពិធីបុណ្យ Deepawali ដែលប្រើសម្រាប់ការតុបតែង និងពិធីបុណ្យសាសនា។ បន្ថែមពីនោះ វាក៏មានអត្ថប្រយោជន៍សុខភាព ដ៏អស្ចារ្យដូចជាជួសជុលជាលិកាស្បែកថ្មី និងទឹកតែផ្កា ស្បៃរឿងគឺជាឱសថដ៏ល្អសម្រាប់ដំបៅមាត់ និងក្រពះ។

ផ្កាឈូក

ផ្កាឈូក គឺជាប្រភេទរុក្ខជាតិទឹកដ៏ស្រស់ស្អាតបំផុត ហើយជាផ្កាជាតិរបស់ប្រទេសឥណ្ឌា។ ផ្កាឈូក ក្រៅពីមានប្រយោជន៍គ្រប់បែបយ៉ាងរាប់តាំងមើម ឬស ដើម ស្លឹក ផ្លែ​និងផ្កាហើយនោះ វាក៏ត្រូវបានគេប្រើសម្រាប់ព្យាបាលរោគរាគ, ជំងឺអាសន្នរោគ, និងគ្រុនក្ដៅផងដែរ។

ផ្កាឆ័ត្រ ឬផ្កានាឡិកា

ផ្កាឆ័ត្រ មានដើមកំណើតនៅប្រទេសម៉ាដាហ្គាស្ការ ប៉ុន្តែឥឡូវនេះត្រូវបានគេរកឃើញទូទាំងពិភពលោក ហើយត្រូវបានដាំដុះជារុក្ខជាតិលម្អ និងជារុក្ខជាតិឱសថ។ វាមានអត្ថប្រយោជន៍ ប្រើសម្រាប់ប្រឆាំងនឹងជំងឺជាច្រើននៅក្នុងឱសថបុរាណឥណ្ឌា។

ផ្កាកុលាប

ផ្កាកុលាបគឺជាផ្កា ដ៏ពេញនិយម មានរាប់រយប្រភេទដែលមានពណ៌ខុសៗគ្នា ហើយប្រភេទភាគច្រើនមានដើមកំណើតនៅប្រទេសឥណ្ឌា និងអាស៊ី។ ផ្កាប្រភេទនេះ ជាប្រភពនៃវីតាមីន C ដែលអាចប្រើក្នុងឱសថបុរាណ សម្រាប់បញ្ហាក្រពះ។

ផ្កាឈូករ័ត្ន

ផ្កាឈូករ័ត្ន ត្រូវបានដាំដុះជាចម្បងជាដំណាំអាហារសម្រាប់មនុស្ស និងជារុក្ខជាតិលម្អនៅក្នុងសួនច្បារ។ វាគឺជាប្រភពដ៏ល្អនៃផូស្វ័រ និងមានសារធាតុរ៉ែដែលមានប្រយោជន៍សម្រាប់សុខភាពរបស់យើង និងជួយកាត់បន្ថយសម្ពាធឈាម និងជំនួយដល់សុខភាពឆ្អឹង៕